Canti e filastrocche su Bologna

Din dan don La campaena d'frae Simon. Tott al dè i la sunaeven. Pan e ven i guadagnaeven, I guadagnaeven un paer d'cappon Da dunaer ai su padron. I su padron in j èren brisa, J èrn' invezi dapp a l'oss A tajaer el j uracc' al cocch. Cocco, cocco malandren, Dà la vola al tò mulen, Dà la vola al tò canael, Ch'a j è trai potti da maridaer. Onna cùs e cl'aetra tàja. Onna fa i caplen di pàja, Onna fa i caplen di spen Da dunaer a Luvigen. Luvigen l'è tant e blen, L'ha una rósa int al caplen, L'ha la ròsa ch'l è un bael fiaur, Vìtel là ch'al fa l'amaur. ______________________________ On, dù e tri, Al balan an va piò vi, Al va vì sta premavaira Quand i tìren so la taila. Taila da l'oli D'andaer in purgatòri, Taila dal zil D'andaer in paradis. ______________________________ Sudalen benedatt, Fecca fora trai bacatt, Onna d'or, onna d'arzaint, Cl'aetra ch'fàga vgnir ban taimp.